Hier is God.

Vandag plaas ek 'n stukkie wat my vriend, Pastoor Piet Smit van die AGS Corpus Christi-gemeente in Malmesbury geskryf het. Op sy kenmerkende manier dra Piet 'n groot waarheid oor hier.

HIER IS GOD

In die Britse Museum in Engeland is daar ‘n baie ou seevaartkaart van Noord-Amerika se ooskus en die aangrensende see. Dit is geteken deur ‘n onbekende persoon en dateer uit 1525. Dit bevat interessante gegewens wat die kartograaf daarop aangebring het. So het hy die volgende inskripsies gemaak by dié dele wat nog onbekend en nog nie ontdek was in daardie tyd:

• Hier is reuse.
• Hier is gevaarlike skerpioene.
• Hier is drake.

Die kaart het in sy omswerwinge ook in die hande van sir John Franklin beland. Franklin, het al die vrees inboesemmende inskripsies van die eerste kaartmaker deurgekrap en oor die hele kaart geskryf: HIER IS GOD.

Die nuwe jaar lê voor ons uitgestrek soos ‘n stuk onbekende of onontdekte land. Maklik kan mens dieselfde doen as wat eersgenoemde kaarttekenaar gedoen het. Ons kan al die vrese waaraan ons kan dink daaroor neerskryf en in die proses onsself baie swartgallig maak.

Hoeveel keer in die verlede het die goed wat ons gevrees het toe nie gebeur nie. Ons weet nie wat die jaar vir ons inhou nie. Selfs kenners van die ekonomie en die politiek se voorspellings is bloot bespiegelings.

Wat ek wel met groot sekerheid weet, is dat dit nie onbekend by God is nie. Jes. 46:10 sê van die Here: “wat van die begin af verkondig die einde.” Daar is dus geen onbekende terrein in die nuwe jaar vir die Here nie. Hy was dus reeds by elke draai en swaai van die pad wat ek en jy nog moet stap in die jaar. Die Here hou die toekoms en elkeen van ons in Sy hand. Is Hy nie wonderbaar!

Oor die hele nuwe jaar wil ek dan ook skryf soos wat sir John Franklin geskryf het: HIER IS GOD!

GEBED

So wonderlik om te weet, Here, dat daar vir U geen onbekende terrein is wat die nuwe jaar betref nie. Omdat U leef, sien ek kans vir môre! Amen.

Jy kan elke dag 'n opbouende stukkie van Pastoor Piet Smit ontvang. Teken in deur jou besonderhede in te vul onderaan hul webwerf: 

agscorpuschristimalmesbury.co.za.

Seënwens vir 2016

Kersgroete

Ek het hierdie vroeër vanjaar in Las Vegas afgeneem

Aan al my vriende, familie, kennisse, enigiemand wat hier lees...

Mag jy 'n baie geseënde Kersfees hê, en mag die liefde wat God aan ons openbaar het met Jesus se geboorte jou lewe vul elke dag wat Hy nog vir jou die voorreg gee om hier op aarde te wees!

Ons het 'n lieflike byeenkoms van Afrikaanse gelowiges hier in New Plymouth, Nieu-Seeland gehad vanoggend met 'n rekordbywoning. Dit was so lekker om ou bekendes en nuwe vriende bymekaar te hê om eer aan Jesus te bring. Dit was ook weer my voorreg om die Woord te bedien aan mense wat dit met oop harte ontvang.

Dankie vir almal wat vir ons bid dat die seën van die Here op ons rus!

Groete uit 'n sonnige New Plymouth!

Francois Bredenkamp

Besoek van die Kelbers

Die afgelope naweek was ek en Bessie bevoorreg om ou vriende by ons aan huis te hê, en saam met ons in die kerk Sondag - Johannes en Charlotte Kelber, en hul dogter, Jeanne Hill en kleinseun, Martin Hill.

Ek en Johannes Kelber kom al baie jare saam. Johannes is een van daardie mense wat 'n hart het wat brand vir die evangelie. Vir meer as 50 jaar was hy in die bediening in die NG Kerk in Afrika, en het hy die evangelie aan die Twanas gebring. Sy passie om die liefde van Jesus met die Tswanas te deel is vandag nog net so 'n sigbaar as wat dit al die jare was, al moes hy uittree uit aktiewe bediening vanweë gesondheidsredes. Charlotte is 'n musiekonderwyseres en was baie jare orreliste in die kerk.

Jeanne was daar die nag amper sewe jaar gelede wat ek die eerste keer op Auckland Lughawe geland het. Ons het mekaar toe nog nooit ontmoet nie, maar haar breë glimlag het haar laat uitstaan uit die massa. Sy en haar man Justin het hul hart en huis vir my oopgemaak en na omtrent twee maande saam met hulle en hul pragtige kinders beskou ek myself as familie.

Een van die dinge wat die Kelbers graag doen, is om saam te sing tot eer van die Here. Sondag in die kerk het hulle vir ons Die Heiland is gebore gesing en 'n Tswanalied. Ek deel dit graag omdat dit vir ons so mooi was. 

https://www.youtube.com/watch?v=pcy1JfAnJbk

Ons het Sondag weer 'n lieflike diens gehad in New Plymouth. Die Here is regtig besig om iets moois te doen, en ons gee Hom al die eer! Jy kan na my boodskap luister en/of die hooftrekke lees by:

http://www.soveelmeer.org/worstelinge-met-die-wil-van-god-lesse-wat-josef-aardse-pa-van-jesus-ons-leer/

Hier is 'n kort aanhaling wat ek in die boodskap gebruik het:

Groete aan al my familie & vriende oral oor die wêreld! Onthou, ek hoor graag van jou. Bid vir ons dat die seën van die Here op ons rus, en laat weet as ek vir jou kan bid!

Francois Bredenkamp
taranakichristen@gmail.com

Dankie vir 'n fantastiese naweek!

Baie dankie vir elkeen wat bygedra het om hierdie afgelope naweek so mooi te maak:

Ek het 'n wonderlike verjaarsdag gehad, sommer die hele naweek lank, lieflik afgerond met 'n gesellige kuier na kerk gister, met 'n oorvloed lekker eetgoed en so 'n mooi gesindheid onder mekaar. So 'n gesindheid is goud werd vir enige gemeente.

Vir elkeen wat my geluk gewens het met my verjaarsdag - elke seënwens, sms, elke geskenkie, oproep, Facebook boodskap, ens. 'n Groot dankie, ek voel baie spesiaal!

Ons het gister 'n lieflike oggenddiens gehad. Dis pragtig om deel te wees van 'n dinamiese, groeiende gemeente. Jy kan na my boodskap luister en/of dit aflaai as 'n mp3 by: 

http://www.soveelmeer.org/vandag-kan-die-keerpunt-in-jou-lewe-wees/

Kan ek 'n guns vra: Help my om hierdie boodskap wyd te versprei deur dit te share op jou Timeline en as jy wil, ander sosiale netwerke. Dit gaan nie oor die feit dat dit ek is wat praat nie, maar ek glo baie mense het gister se bemoediging nodig. Net as jy vrymoedigheid het om dit te doen.

Ek groet vir eers.

Geseënde week vir jou!

Francois Bredenkamp
taranakichristen@gmail.com

Dag 11 van dankbaarheid

Vandag sê ek vir die Here Jesus baie dankie vir die voorreg wat ek het om te lewe. Vir baie jare het ek dit as vanselfsprekend aanvaar. Maar soos die jare aanstap, besef mens elke dag is ‘n groot geskenk uit die hand van die Here, soos Jak. 4:15 (1983-vertaling) ons leer, “As die Here wil, sal ons lewe en sal ons dit of dat doen...”

Dankie Here, dat u gewil het dat ek moet lewe. Help my nou om elke dag wat U my gee tot U eer te leef. Dankie vir drome wat ek kan najaag, en vir geleenthede om die drome waar te maak. Dankie vir die gesondheid wat ek het om dit te kan doen. Dankie vir geliefdes wat saam met my die pad loop, sommige van hulle is baie ver, ander weer baie naby. Dis die liefde in hulle harte wat die verskil maak, nie die kilometers tussen ons nie.

En so kom ek aan die einde van my 11 dae van dankbaarheid. Baie dankie vir elkeen wat my geseën het op my verjaarsdag met goeie wense. Ek voel sommer baie geliefd, en dis ‘n goeie begin vir my toekoms wat vandag begin.

Hou gerus hierdie blog dop vir inligting oor projekte waarmee ek besig is. Ek praat binnekort oor die Engelse vertaling van Hoorsels wat feitlik persklaar is, en dan oor die grootste projek wat ek nog aangepak het in my lewe waarmee ek tans besig is....

Onthou my preke word gereeld gelaai op www.soveelmeer.org

Liefde aan almal van julle!

Francois Bredenkamp

taranakichristen@gmail.com

Dag 10 van dankbaarheid

Vandag wil ek vir die Here baie dankie sê vir mense in my lewe wat bereid is om my te help. Ek praat nie van vriende en familie nie. Sommer net mense met wie ek te doen kry in die loop van my alledaagse lewe wat òf self iets vir my doen, òf vir my verwys na iemand wat kan help.

John P. Strelecky, in sy The Big Five for Life, gaan uit van die standpunt dat ‘n mens nie meer as vyf persone weg is van ‘n oplossing van jou probleem nie, ongeag die probleem. Jy moet net vir iemand hulp vra, wat weer iemand ken wat iemand anders ken wat kan help, of wat weer op sy beurt nog iemand anders ken wat weer iemand anders ken wat die antwoord het. Ek hoop daardie sin maak sin. Kortom, iemand ken iemand wat weet hoe om jou te help.

Daar was al in my lewe soveel keer mense wat ‘n groot rol gespeel het, waarskynlik sonder dat hulle dit ooit besef het. En dit moedig my ook aan om so ‘n persoon vir ander mense te wees. As die beker koue water aan ‘n vreemdeling nie ongesiens by die Hemelse Vader verbygaan nie, maar deur Hom beskou te word as iets wat ons vir Hóm doen (Mat. 25:35), dan beteken dit dat alles wat ek vir mense doen, belangrik is. Mag dit nooit wees dat iemand vir my so onbelangrik is dat ek halfhartig die persoon help nie! Dit mag dalk vir my na ‘n klein dingetjie lyk. Dit was die klein dingetjies in die lewe wat groot verskille in my lewe gemaak het.

Vir wie gaan ons volgende die iemand wees met die antwoord?

Môre is die finale dag van my dankbaarheidsreeks. Soos ek aan die begin gesê het, ek wou elke dag in Desember tot met my verjaarsdag elke dag vir die Here dankie sê vir iets spesiaal. Môre kom ek aan die einde, nie van my dankbaarheid nie, maar van my reeks refleksies hieroor.

Ek hoor graag van jou.

Francois Bredenkamp

taranakichristen@gmail.com