Dag 8 van dankbaarheid

Vandag sê ek vir die Here Jesus baie dankie vir geleenthede om ‘n verskil in mense se lewe te maak.

Op elkeen van ons se lewenspad loop ons mense raak vir wie ons tot seën kan wees. Die Engels praat van serendipity, daardie skynbare toevallige sameloop van omstandighede wat meebring dat dinge net reg vir jou uitwerk. Vir my as gelowige is daar nie so iets soos toeval nie. Ek glo dat God ‘n mens geleenthede gee om mekaar se lewe te verryk. Dis lekker as mens aan die ontvangkant is. Jesus het ons egter geleer, “Dis saliger om te gee as om te ontvang.” (Hand. 20:35).

Ek is dankbaar vir daardie kere in die verlede wat ek ‘n verskil kon maak in iemand se lewe. Die waarheid is egter dat ‘n mens baie selde weet jy beteken iets vir iemand. Daarom maak dit ‘n mens se hart warm wanneer iemand later vir jou dankie sê. Doen ons dit genoeg teenoor mekaar? Ek glo nie. Nog iets waaraan ek persoonlik sal moet werk, want in my lewe is daar soveel mense wat deur die jare vir my gedra het met hul vriendskap en bystand toe dit regtig saak gemaak het.

Enigiets wat ons vir iemand met ‘n opregte hart doen met die doel om die persoon te help, gaan ‘n verskil maak.

“Want God is nie onregverdig om julle werk te vergeet en die liefde-arbeid wat julle betoon het vir sy Naam, omdat julle die heiliges gedien het en nog dien.” (Hebr.6:10). Ek kan baie name hier noem van mense wat my gedien het deur die jare. Die Here ken jou naam. Hý sal jou beloon. Maar ek sê: Baie dankie!

“Daarom, my geliefde broeders, wees standvastig, onbeweeglik, altyd oorvloedig in die werk van die Here, omdat julle weet dat julle arbeid in die Here nie tevergeefs is nie.” (1 Kor. 15:58).

‘Laat ons dan, terwyl ons die geleentheid het, aan almal goed doen, maar die meeste aan die huisgenote van die geloof.” (Gal. 6:10).

Daarom wil ek elke dag, deur die genade van ons Here Jesus Christus, die liefde van Jesus met mense deel. Dankie vir die voorreg as ek dalk ook vir jou êrens iets kon beteken het. 

Groete uit New Plymouth

Francois Bredenkamp